Дагавор аб партнёрскім супрацоўніцтве паміж Міёршчынай і гмінай Гонёндз Падляшскага ваяводства заключаны ў райвыканкаме па выніках візіту польскай дэлегацыі 8 лістапада. Дакумент замацавалі подпісамі кіраўнікі бакоў — Ігар Кузняцоў і Марыюш Раматоўскі.
Дэлегацыя гасцей нешматлікая, але прадстаўнічая. У яе складзе Саветнік Пасольства Рэспублікі Польшча ў Рэспубліцы Беларусь Міхал Хабрас, бургамістр горада і гміны Гонёндз Падляшскага ваяводства Марыюш Раматоўскі, інспектар Адміністрацыі Аркадзіуш Студнярэк. Іх візіт можна назваць заканамерным працягам леташняй майскай сустрэчы. Тады ў рамках азнаямляльнага тура па нашай краіне войты гмін, бургамістры польскіх гарадоў упершыню наведалі міёрскую зямлю. Знаёмства паклала пачатак цёплым сяброўскім стасункам. Знайшліся агульныя інтарэсы з прадстаўнікамі адміністрацыі Падляшскага ваяводства, з'явілася жаданне ўзаемавыгадных дзелавых кантактаў у экана-мічнай, турыстычнай і культурнай сферах.
Хапіла паўтара года, каб бакі дамовіліся, як аб'яднаюць рэсурсы і сілы для рэалізацыі сумесных задач. Імкненне хутка перайсці ад слоў да справы было ўзаемным. Важкі ўклад у гэта зрабіў і Надзвычайны і Паўнамоцны Пасол Рэспублікі Польшча ў Рэспубліцы Беларусь Конрад Паўлік, за што кіраўнік Міёрскага раёна Ігар Кузняцоў адрасаваў яму асаблівую падзяку.
Прадукцыйнаму супрацоўніцтву суседзяў спрыяе і Саветнік Пасольства Рэспублікі Польшча ў Рэспубліцы Беларусь Міхал Хабрас. Падчас падпісання дагавора ён не стаў надаваць шырокай галоснасці ўсім праектам. Назваў некалькі, якія плануецца рэалізаваць у наступным годзе. Сярод іх—абсталяваць кэмпінг для аўтатурыстаў у Перабродскім сельсавеце, што прапанаваў міёрскі бок. Вырошчваць карысныя зёлкі—ідэя польскіх ініцыятараў. У снежні гэты праект абмяркуецца больш дэталёва.
Вялікую цікавасць для палякаў уяўляе калона ў Лявонпалі. Гэта адзін з нямногіх помнікаў, прысвечаных Канстытуцыі Рэчы Паспалітай 1791 года, 325-годдзе якой шырока адзначалася ў Польшчы. Рэстаўрацыйныя работы па аднаўленні гістарычнай рэліквіі — таксама ў сумесных планах.
У ходзе двухдзённага візіту польская дэлегацыя наведала візіт-цэнтр "Ельня", у суправаджэнні гісторыка раёна Вітольда Ермалёнка пазнаёмілася з вартасцямі самага маленькага горада Беларусі — Дзісны. Ушанавала памяць польскіх салдат, пахаваных у вёсцы Драгуны Павяцкага сельсавета.
На развітанне госці шчыра дзякавалі за гасціннасць на міёрскай зямлі, не ўтойвалі жадання вяртацца сюды зноў.
Фота Казіміра БЛАЖЭВІЧА.
Наталія СТАНКЕВІЧ.