Газета "Советская Белоруссия", орган Адміністрацыі прэзідэнта, апублікавала артыкул пра Віктара Шульгу,апазіцыянера з Мёраў.
Карэспандэнт Максім Осіпаў піша, што ў рэдакцыю прыйшоў ананімны ліст з Мёрскага раёна. Аўтар ліста пісаў пра Віктара Шульгу, актывіста апазіцыйнай Аб'яднанай Грамадзянскай Партыі, які дзеля прынцыпу адмовіўся выконваць рашэнне партыі аб байкоце прэзідэнцкіх выбараў у кастрычніку 2015 года.
Карэспандэнт "Советской Белоруссии"паехаў у Мёры і сустрэўся з Віктарам Шульгом. Шульга прызнаўся карэспандэнту, што ананімны ліст з хвалебнымі словамі на свой адрас... ён напісаў сам.
Шульга паскардзіўся, што кіраўніцтва АГП "камандуе як марыянеткамі"шараговымі сябрамі. Ён падзяліўся "каштоўным"меркаваннем, што адзін з апазіцыянераў у Мёрах - грубы і хамскі чалавек, а іншы - кіруецца не розумам, а эмоцыямі. Карэспандэнт "СБ"не называе іх імёны, ды можна здагадацца, што мова ідзе пра сябраў Беларускай Хрысціянскай Дэмакратыі.
Таксама Шульга выказаў перакананне, што ў 2006 годзе трэба было выбіраць адзіным кандыдатам ад апазіцыі не Мілінкевіча, а Лябедзьку.
"Весткі", колькі існуюць, пільна асвятляюць дзейнасць палітычных партый і няўрадавых арганізацый на Паазер'і. Ад 2008 года, калі Віктар Шульга балатаваўся ў парламент, яго імя і дзейнасць не фігуравалі ў навінах.
Наогул, апазіцыя ў Мёрах - гэта асобная песня. Мёры - невялікі горад, але ў ім больш, чым у суседніх гарадах, актывістаў апазіцыі. І гэтыя актывісты, з якімі давялося быць знаёмым, гатовыя цэлымі гадзінамі абмяркоўваць тэарэтычныя пытанні, але штодзённай дзейнасці ад іх не чуваць.
Хоць у Мёрах грамадскія праблемы на паверхні ляжаць. Чвэрць стагоддзя не могуць дабудаваць раённы шпіталь. Апазіцыянерам варта не ананімкі ў газету пісаць і не ідэю "агульнанацыянальнага страйку"на вушы вешаць - а скласці зварот на імя Лукашэнкі, прайсці па горадзе, сабраць некалькі сотняў подпісаў. Можа, гэта дапамагло б паскорыць будоўлю - а калі не, дык хоць бы рэпутацыю сабе палепшылі.
Ні на затрымкі заробкаў у аграпрадпрыемствах у 2015-16, ні на вынішчэнне свіней і адмену цягніка ў 2013 - актывісты з Мёраў ніяк не адрэагавалі. Затое пра пра пытанне байкоту выбараў гатовыя спрачацца і спрачацца, і нават да дзяржаўнай газеты звяртацца па дапамогу.
А "Советская Белоруссия"піша пра апазіцыю не для таго, каб інфармаваць чытачоў пра альтэрнатыўныя партыі і палітыкаў. А дзеля таго, каб прадставіць у чорным святле і апазіцыю, і - праз гэта - саму ідэю дэмакратычнай, рыначнай, прававой дзяржавы. Карэспандэнт "СБ"уважліва слухаў Віктара Шульгу, каб ягоныя словы павярнуць супраць ідэі, якую Шульга вызнае.